Piratok portuan gelditu gara

2021. urtean sartu berri gara, eta nire lehen posta iraganera begiratuz egin nahiko nuke. Askotan pribatutasuna dut gai nagusi bezala. Pixkanaka-pixkanaka guk galtzen utzi dugun pribatutasun hori; batzuetan, bizitza errazten digun zerbitzu baten truke, beste batzuetan ordea, guk geuk zabaltzen dugulako gure informazio pribatua sare sozialetan.

Asko aldatu da internet azken 20 urteetan. Nik, eta nirekin batera internet ezagutzen hasi zen belaunaldiak, anonimotasunean oinarritzen genuen nabigazioa. Benetako izen eta abizenen ordez, ezizenak erabiltzen genituen, horregatik leku guztietan aldakur ezizena erabiltzen dut, baina nire benetako izen eta abizenarekin era bat lotuta dago dagoeneko.

Napster, Emule, Torrent… euskarri digitalak eskaintzen duen erraztasunaz baliatuz, hauek elkarbanatzeko dozenaka tresna ezagutu ditugu. Urte oso interesgarriak ziren. Alde batetik, kultura elkarbanatzea delitua ez dela defendatzen genuen eta zinema, musika, joku eta bestelako industria garai berrietara moldatu behar zela aldarrikatzen genuen. Copyleft lizentzia lezagutu nuen eta mundua aldatzen ari zela uste nuen.

Urteak pasa dira, eta aipatutako industriak digitalizazioak eskatzen zuenaren arabera moldatu dira; musikan spotify, zineman HBO, Netflix, Filmin…. Noski, artisten egoera eszena berri honetan aztertu beharrekoa litzake.

Kontua da, anonimotasunarekin batera musika eta pelikulak elkarbanatzeari ere utzi diogula. Behintzat, nire kasu partikularrean hala gertatu da. MotoGP mundiala ikusteko dazn daukat, pelikulak eta serieak HBO eta Netflix, azken hilabete honetan DisneyPlus (The Mandalorian ikusi behar nuen) eta azkenik, gehien erabiltzen dudan zerbitzua, Spotify. Aipatutako guzti hauetatik urte osoan zehar ordaintzen dudan bakarra Spotify da. Besteak, noizbehinka hilabete gutxi batzuetan zehar kontratatzen ditut. Torrent bezalako programak erabiltzeari utzi ez badiot ere, egia da gutxi erabiltzen dudala. Behintzat ez lehen bezala.

Barkua portuan utzi dut. Orain, tren batean nabil eta betikoek eraiki dituzte trenbideetatik nabigatzen dut. Ez dakit, baina, bide iluna delaren susmoa daukat.