Spotify, genozidioa eta alternatibak

Zabaldu da albistea: Spotifyk Israelarekin harreman ekonomiko estuak ditu. Hori dela eta, hainbat artistek salatu dute egoera eta alternatiben bila dabiltzala adierazi dute. Ni software librearen aldekoa naiz, baina badira Euskal Herrian honen inguruan lan ikaragarri handia egiten duten hacktibistak, eta Software Librean oinarritutako tresnak zabaltzen dituzte. Adibidez, arrakastatsuenetariko bat Mastodon dugu (X librearen parekoa).

Ni Mastodon erabiltzailea naiz, baina ez dut X guztiz baztertu. Ni Nextcloud erabiltzailea naiz, baina ez dut Google Drive baztertu. Ni Puntueus-eko posta elektronikoaren erabiltzailea naiz, baina ez dut Gmail baztertu. Nire taldearen musika Spotify-n dago eta plataformaren harpideduna naiz. Ni software librearen erabiltzailea naiz, baina post hau MacBook baten bitartez idazten ari naiz. Kontraesanak? sistema? auskalo.

Ehunka dira alternatiba libre eta etikoen bultzadak (goazen lagunok), baina ez dugu arrakastaren botoi magikoa aurkitu. Auskalo noizbait lortuko dugun.

Zalantzarik gabe Spotify da munduko artista eta entzule gehienok erabiltzen dugun plataforma, eta gaur egun duen indarra ikusita oso zaila ikusten dut mugimendu txiki batek hau aldatzea. Hala ere, esan beharra dut: arrakastaz eta mugimendu txikiez hitz egin behar badugu, Euskal Herria da lekua. Euskal Herrian mugimendu sozial eta autogestionatuak modu arrakastatsuan artikulatzeko gai izan gara beti; beraz, kasu honetan ere ezin dugu ezer baztertu. Kontua da, Spotify mundu mailan musikaren monopolioa lortu duela eta ondorioz play list berean izan dezaket Su Ta Gar, Lady Gaga edo Rage againts The Machine.

Dena den, post honen helburua ez da alternatibak plazaratzea, baizik eta gure artisten lana, indarra eta konpromisoa berrestea, indartzea eta txalotzea. Beti egon dira lehen lerroan, beti gauzak aldatu nahian, salatzen, sokak astintzen.

Beraz, aldaketarik lortu ez arren ere, eskerrik asko saiakeragatik, intentzioagatik, salaketagatik eta gaitzespenagatik.

Gora zuek!