Handiengandik ihes egiten (III)

Aurreko atalak

Handiengandik ihes egiten (I) Firefox

Aurreko postan (Handiengandik ihes egiten (I)) Firefox nabigatzailea lehenetsi bezala erabiltzea gomendatu nuen. Nik, hala egiten dut ordenagailu zein smartphonean.

Handiengadik ihes egiten (II) LibreOffice

Microsoft Office baztertu eta Google Drive-ek eskaintzen duen aukeratik alde egiteko idazten nuen aurreko postan. (Handiengandik ihes egiten (II))

Bilaketak duckduckgo bilatzailearekin

Esan beharrik ez dago Google bilatzailea erabiltzen duzun bakoitzean zure pribatutasunaren kalterako dela. Besteak beste, egiten duzun bilaketa oro gordeta gelditzen da eta zure IP helbidea zein bestelako datuak gurutzatuz Googleek lasai asko jakin dezake nor zaren. Horregatik, orain arte planteatutako aldaketa guztietatik hau da garrantzitsuena.

Hasiera batean zaila izan daitekeela pentsa dezakezu. Normala da, nik ere berdina pentsatu nuen. Ez da lehen aldia duckduckgo bilatzailea erabiltzen saiatzen naizela, baina oraingoan badirudi bere erabilpenari ohitu naizela eta ez dudala Googleen beharrik.

Adi! duckduckgo ez da bilatzaile librea. Badira bilatzaile libreak, baina ezin ditut gomendatu ez baititut oraindik erabili eta ez ditut asko ezagutzen. Hala ere itxura oso ona daukate beraz, ikerketa txiki bat egin behar dut honen inguruan.

Nola erabili ducduckgo

Egia esan azalpen gutxi behar ditu. duckduckgo.com helbidea edozein bilatzaile bezalakoa da, sinplea. Bilatzen ari zarena erdian dagoen testu kaxatxoan jarri eta botoi nagusia sakatu. Googleek itzulitako emaitzak eta duckduckgok erakusten dituenak oso antzekoak dira. Ez duzu web garrantzitsurik galduko.

Pertsonalizatu bilatzailea

Aukera asko eskaintzen ditu berarekin eroso sentitzeko. Web orrialdean menu bat zabaltzeko ikonoa daukazu. Bertan, aukera asko eskaintzen dituela ikusiko duzu. Hizkuntza, iragarkiak desgaitzeko aukera, auto-iradokizunak, emaitzak eskualdeko espezifikazioen arabera bistaratu… noski, gai edo diseinu nagusiaren koloreak hautatzeko aukera ere daukazu.
Aipatu ditudan hauek eskuragarri dituzun aukera guztietatik gutxi batzuk dira. Egokiena, norberak bilatzailean sartu eta ezarpenetan kuxkuxeatzea izango da.

duckduckgo bitartez Google erabili

Gerta daiteke jasotako emaitza batekin guzti ados ez egotea eta ea Googleek zer dion jakiteko kuriositatea izatea. Kasu honetan ere, duckduckgok aukera azkarra eskaintzen dizu. Bilaketaren amairen !g idatzi eta zuzenean google bilatzailera bidaliko zaitu zure bilaketaren erantzunarekin. Hau da, edozein momentutan Google erabili dezakezu !g karaktereak erabiliaz.

Normalean ez dut aukera hau erabilzen, baina aizu! hor dago, interesgarria da eta bai! noizbait erabili izan dut. Ez da ezer gertatzen. Aldaketak ez dira inoiz errazak eta ez dute zertan %100 behin-betikoak izan beharrik. Lasai.

duckduckgo aukera lehenetsi bezala ezarri

Beraz, gauzak errazteko eta modu eroso batean erabiltzen hasteko egin behar duzun lehen gauza zure gailuen nabigatzaile guztietan (pc, smartphone…) bilatzaile lehenetsi bezala jartzea izango da.
Firefox (jadanik Firefox erabiltzen duzulako 😉 ) nabigatzailearen aukeretan search atalean aurkituko duzu aldaketa hau egiteko aukera.

Android sistema eragilean Firefox zein Chrome nabigatzaileetan aldaketa berdina egin dezakezu inongo arazorik gabe. Gainera nahi baduzu Google Playean DuckDuckGo Privacy Browser deituriko aplikazioa duzu. Hau, pribatutasun ezarpenak konfiguratutako Android nabigatzailea da. Nik oraindik ez dut asko probatu, baina Firefox nabigatzailearen oso antzekoa dela ikusi dut.